Ish-Ministri i Jashtëm sllovak, Miroslav Lajcak dhe ish-emisari për dialogun Kosovë-Serbi ka njoftuar se, pas publikimit të komunikimeve me abuzuesin e dënuar seksual Jeffrey Epstein, ai jep dorëheqjen nga pozicioni i tij si këshilltar i Kryeministrit sllovak Robert Fico, raportuan mediat sllovake.
Lajçak dënoi krimet e kryera nga Jeffrey Epstein në deklaratën e tij dhe theksoi se nëse do ta kishte ditur në të kaluarën dhe shkallën e plotë të veprimeve të Epstein, nuk do të kishte pasur komunikim midis tyre.
Ndërkohë kryeministri Fico, deklaroi se do ta pranonte dorëheqjen e Lajçakut.
“Miroslav e ka dëshmuar edhe një herë veten si një diplomat i shkëlqyer dhe unë e pranoj ofertën e tij për t’i dhënë fund bashkëpunimit tonë, megjithëse të gjithë ne, jo vetëm unë, po humbasim një burim të jashtëzakonshëm përvoje në diplomaci dhe politikë të jashtme. Është e çuditshme që një simbiozë e ngjashme e medias, opozitës dhe partive qeveritare nuk e shënjestroi liderin e opozitës Simecek, i cili, përmes mashtrimit me grante në nivelin e Sllovakisë dhe BE-së, përfaqëson një rrezik shumë më të madh për reputacionin e vendit tonë sesa këshilltari i kryeministrit, Miroslav Lajçak”, ka thënë Fico.
