Presidenti i SHBA-së, Donald Trump, i ka bërë thirrje Iranit të nisë bisedime për një marrëveshje, ndërsa Shtetet e Bashkuara po rrisin praninë ushtarake në Lindjen e Mesme.
Trump konfirmoi se aeroplanmbajtësja USS Abraham Lincoln dhe grupi i saj sulmues janë vendosur në rajon, duke e cilësuar këtë si një sinjal të drejtpërdrejtë ndaj Teheranit.
Ai paralajmëroi se një sulm i madh mund të jetë i nevojshëm nëse Irani nuk pranon të negociojë për çështjen bërthamore.
Në një postim në rrjetin Truth Social, Trump deklaroi se SHBA synon një marrëveshje që përjashton armët bërthamore dhe që është “e drejtë për të gjitha palët”, por theksoi se “koha po mbaron”. Ai shtoi se Irani duhet të shmangë përshkallëzimin e situatës.
Trump tha gjithashtu se Teherani ka shfaqur gatishmëri për bisedime. Në një intervistë për Axios, ai u shpreh se Irani ka kontaktuar disa herë për të diskutuar një marrëveshje të mundshme.
