Sekretari amerikan i Shtetit, Marco Rubio, deklaroi se Shtetet e Bashkuara po shqyrtojnë mundësinë e rikthimit të një pranie të përhershme diplomatike në Venezuelë, pas zhvillimeve të fundit politike në vend.
Duke folur në një seancë dëgjimore para Komisionit të Punëve të Jashtme të Senatit, Rubio tha se një ekip amerikan ndodhet në terren për të vlerësuar situatën dhe se hapja e një misioni diplomatik amerikan mund të realizohet në të ardhmen e afërt.
“Ne kemi një ekip në terren që po vlerëson kushtet dhe besojmë se mund të hapim një mision diplomatik amerikan në një periudhë të afërt, për të marrë informacion në kohë reale dhe për të ndërvepruar drejtpërdrejt,” u shpreh Rubio.
Ai shtoi se Uashingtoni ka krijuar një linjë komunikimi që e cilësoi “të respektueshme dhe produktive” me udhëheqësit e përkohshëm të Venezuelës.
Ndërkohë, mediat e huaja raportojnë se presidenti venezuelian Nicolás Maduro është arrestuar më 3 janar gjatë një operacioni ushtarak amerikan në Karakas dhe është dërguar në Shtetet e Bashkuara, ku po mbahet në paraburgim në Nju Jork. Sipas këtyre raportimeve, autoritetet amerikane synojnë ta gjykojnë atë për akuza që lidhen me trafik droge.
