Njerëzimi është më pranë se kurrë një krize globale. Shkencëtarët e Bulletin of the Atomic Scientists kanë vendosur “Orën e Qametit” në vetëm 85 sekonda para mesnatës, niveli më alarmues i shënuar ndonjëherë që nga krijimi i këtij treguesi simbolik.
Vendimi reflekton rritjen e rreziqeve që lidhen me armët bërthamore, ndryshimet klimatike dhe zhvillimin e pakontrolluar të teknologjive të avancuara.
Sipas Euronews, vendimi i shkencëtarëve është marrë duke analizuar disa faktorë kryesorë, përfshirë rritjen e tensioneve bërthamore mes fuqive të mëdha, përkeqësimin e krizës klimatike dhe rreziqet në rritje nga teknologjitë e avancuara si inteligjenca artificiale dhe bioteknologjia.
Në deklaratën zyrtare thuhet se bashkëpunimi ndërkombëtar po dobësohet, ndërsa nacionalizmi dhe konkurrenca gjeopolitike po rrisin mundësinë e konflikteve dhe krizave globale.
“Ora e Apokalipsit” nuk është një orë reale, por një simbol paralajmërues që synon të tërheqë vëmendjen e opinionit publik dhe të nxisë udhëheqësit botërorë të ndërmarrin veprime urgjente për të shmangur kërcënimet më të mëdha ndaj njerëzimit.
