Forcat e Armatosura Izraelite kanë bombarduar zona në jug dhe lindje të Libanit, pasi më herët kishin lëshuar thirrje për evakuimin e disa komuniteteve, duke deklaruar se objektivat e operacionit ishin infrastruktura e Hezbollah dhe e Hamas.
Sipas njoftimeve zyrtare, koloneli Avihai Andrai, zëdhënës i ushtrisë izraelite për publikun arabishtfolës, bëri thirrje për evakuimin e katër komuniteteve përmes një postimi në platformën X. Komunitetet e përmendura ishin Kfar Hata dhe Annan në jug të vendit, si dhe Al-Manara dhe Ain al-Tina në lindje. Mesazhi shoqërohej me harta të zonave të përfshira, ndërsa banorët u paralajmëruan se qëndrimi në këto zona përbënte rrezik për jetën e tyre.
Një fotograf i AFP raportoi se kishte parë dhjetëra familje duke u larguar nga komuniteti Kfar Hata pak para nisjes së sulmeve, ndërsa dronë fluturonin mbi zonë.
Mediat ndërkombëtare theksojnë se, pavarësisht një armëpushimi të rënë dakord pas më shumë se një viti armiqësish dhe që supozohet se ka hyrë në fuqi në nëntor 2024, ushtria izraelite ka vijuar sulmet dhe operacionet në pjesë të ndryshme të Libanit, kryesisht në jug, duke deklaruar se synon pozicione të Hezbollahut dhe Hamasit.
Trupa izraelite mbeten gjithashtu të dislokuara në pesë pika në jug të Libanit, të cilat konsiderohen strategjikisht të rëndësishme. Sipas të dhënave të Ministrisë së Shëndetësisë libaneze, të cituara nga AFP, të paktën 350 persona janë vrarë nga sulmet izraelite që nga hyrja në fuqi e armëpushimit.
