Një dëshmitar i ngjarjes së regjistruar pak ditë më parë në Durrës, ku 56-vjeçari Mikel Ndoji plagosi me thikë vajzën e tij 24-vjeçare Xhesika Ndoji, ka treguar detaje të rënda mbi rastin.
Në një lidhje për emisionin, ‘Me zemër të hapur’, dëshmitari i cili jo vetëm që pa nga afër ngjarjen e rëndë që u zhvillua në rrugë, por edhe e njeh nga afër familjen, akuzoi babanë e vajzës se ai e kishte planifikuar të vriste atë prej 1 muaj.
Sipas dëshmitarit, babai i kishte vendosur vajzës thikën në qafë dhe kishte mirëorganizuar planin për ta vrarë, ndryshe nga çfarë pretendoi një ditë më parë Ndoji, i cili shprehu pendesë dhe tha se ishte nën efektin e alkoolit.
“Është diçka e përsëritur. Duke parë dëshminë e personit, nuk është e vërtetë. Ai e ka pasur si plan që të dëmtonte vajzën, por dhe të shoqen e vetë. Ata ishin prej 6 vitesh të divorcuar. Ai kishte një muaj që kishte dalë nga burgu. Nuk ishte diçka e rastësishme, por ishte e planifikuar prej 1 vit. Ai kishte ardhur për ta vrarë vajzën dhe jo për ta diskutuar. Ai erdhi me biçak, ia vuri në fyt. Nuk erdhi për ta diskutuar, por për ta vrarë. E kishte deklaruar dhe nëpër lokalet e lagjes, pasi thoshte; ‘do t’i vras’, por se merrnin shumë seriozisht se ishte pijanec. Mbi 8 cm në fyt djali, ishte gati për të vdekur. Por shpëtoi.
Dhe vajza ishte gati për tu vrarë, por duke u përleshur me babanë shpëtoi fytin, por e mori në krah. Ka 14 qepje vajza. Kolegu i vajzës për fatin e mirë, vetëm 2 mm e ndante nga damari kryesor që mund të ishte fatale gjëja. Ishte çarje e thellë prej 6-7 cm. E pashë me sytë e mi. Unë e dërgova në spital. Vajza dhe djali janë në gjendje të mirë tani, kanë kaluar rrezikun. Më në rrezik ishte djali, por dhe vajza rrezikoi syrin. Ajo ka 14 qepje. Ishte plan i mirëorganizuar. Dhuna ka qenë prezentë në këtë familje. Ka qenë përsëritës. Ka një urdhër-mbrojtës për nënën e vajzës. Ai tentonte gjithmonë për t’u bashkuar. E bezdiste për lekë vajzën dhe në xhiro po ashtu.
Edhe në punën që ka qenë më parë, ai kishte shkuar dhe e kishte bezdisur, por atje e kishin rrahur punonjësit e sigurisë. Më shumë debatet i ka pasur me vajzën, kishte mllef. Ai ishte i dhunshëm dhe ndaj vajzës, por më shumë ndaj të ëmës. Për faj të dhunës kanë pasur probleme jo pak të vogla e ëma. Kanë 6 vite të ndarë çifti. Ndryshe nga vajza, djali kishte kontakte me të atin. Ishte ai që donte t’i jepte një mundësi. Goca s’ka dashur kurrë që ta afronte se e ka njohur mirë babanë.”, ka treguar dëshmitari.
