Presidenti i SHBA-së Donald Trump ka reaguar ndaj ngjarjeve të fundit në Minneapolis përmes disa postimeve në rrjetet sociale, ku ka mbrojtur operacionet federale të emigracionit dhe ka akuzuar demokratët për përshkallëzimin e tensioneve.
Në postimet e publikuara mbrëmjen e kaluar, Trump deklaroi se republikanët fituan “në masë të madhe” zgjedhjet presidenciale të vitit 2024 pasi, sipas tij, partia u angazhua për të nisur “dëbimin masiv më të madh të kriminelëve emigrantë të paligjshëm në historinë amerikane”.
Ai theksoi se operacionet e kryera në qytetet dhe shtetet e drejtuara nga republikanët po zhvillohen “në mënyrë paqësore dhe të rregullt”, pa protesta apo trazira.
“Gjithçka po ecën qetësisht dhe pa probleme,” shkroi Trump në platformën e tij Truth Social.
Në të kundërt, presidenti akuzoi qytetet dhe shtetet e drejtuara nga demokratët se po refuzojnë bashkëpunimin me Shërbimin Amerikan të Emigracionit dhe Doganave (ICE).
“Me këtë sjellje, demokratët po vendosin kriminelët emigrantë të paligjshëm mbi qytetarët që respektojnë ligjin dhe paguajnë taksa, duke krijuar rrethana të rrezikshme për të gjithë të përfshirët,” shtoi Trump.
