Zhvillime tronditëse dalin në dritë për Zhang Youxia, një nga gjeneralët më të lartë të Kinës dhe bashkëpunëtor i ngushtë i presidentit Xi Jinping.
Sipas një raportimi ekskluziv të Wall Street Journal, ai akuzohet për rrjedhje të të dhënave sekrete mbi armët bërthamore të Kinës drejt Shteteve të Bashkuara, si edhe për marrje ryshfeti në këmbim të gradimeve dhe emërimeve zyrtare.
Sipas burimeve të larta të cituara nga media amerikane, Zhang dyshohet se ka shpërndarë informacione të ndjeshme mbi programin bërthamor kinez dhe ka pranuar pagesa të mëdha për akte zyrtare, përfshirë edhe ndihmën në promovimin e një oficeri deri në postin e ministrit të Mbrojtjes.
Hetim për shkelje të rënda të disiplinës partiake dhe ligjit
Informimi i brendshëm mbi çështjen, i zhvilluar me dyer të mbyllura dhe në prani të zyrtarëve më të lartë të ushtrisë kineze, u mbajt pak para se Ministria e Mbrojtjes Kombëtare e Kinës të njoftonte zyrtarisht nisjen e një hetimi ndaj Zhang Youxia-s. Njoftimi zyrtar ishte i shkurtër, duke përmendur vetëm shkelje serioze të disiplinës partiake dhe ligjeve shtetërore.
Sipas informacioneve, Zhang po hetohet edhe për krijim klikash politike, një term që në Kinë përdoret për ndërtimin e rrjeteve të ndikimit që minojnë unitetin e Partisë Komuniste, si dhe për abuzim me pushtetin brenda Komisionit Qendror Ushtarak, organi më i lartë vendimmarrës i ushtrisë.
Autoritetet po shqyrtojnë gjithashtu rolin e tij mbikëqyrës në një agjenci kyçe që merret me kërkimin, zhvillimin dhe prokurimin e pajisjeve ushtarake, ku dyshohet se janë dhënë ryshfete masive për gradime brenda një sistemi me buxhete shumë të larta.
Akuza më e rëndë: rrjedhje e sekreteve bërthamore
Akuza më tronditëse, sipas burimeve të WSJ, është se Zhang Youxia ka rrjedhur të dhëna teknike kyçe mbi armët bërthamore të Kinës drejt SHBA-së. Detajet konkrete të kësaj shkeljeje të sigurisë nuk janë bërë publike.
Hetim edhe ndaj një tjetër zyrtari kyç
Disa nga provat ndaj Zhang thuhet se kanë ardhur nga Wu Hun, ish-drejtori i përgjithshëm i China National Nuclear Corp., kompania shtetërore që mbikëqyr programet bërthamore civile dhe ushtarake të Kinës. Pekini njoftoi javën e kaluar edhe nisjen e një hetimi ndaj Wu për shkelje serioze të disiplinës dhe ligjit.
Autoritetet kineze kanë lidhur hetimin ndaj Wu me një incident sigurie në sektorin bërthamor, ku dyshohet se është përfshirë edhe Zhang Youxia.
Goditja më e fortë ndaj ushtrisë që nga Mao
Analistët vlerësojnë se kjo fushatë e re kundër korrupsionit dhe “mosbesnikërisë” në ushtri përbën goditjen më agresive ndaj udhëheqjes ushtarake kineze që nga koha e Mao Ce Dunit.
Zhang Youxia, anëtar i Byrosë Politike dhe pjesë e të ashtuquajturve “princër të kuq” – pasardhës të elitës revolucionare – ishte konsideruar për vite me radhë si një nga aleatët më të besuar të Xi Jinping.
Sipas analistëve, spastrimi i tij tregon se Xi Jinping ka konsoliduar plotësisht kontrollin mbi ushtrinë, duke e parë korrupsionin, rrjedhjen e sekreteve shtetërore dhe rrjetet e patronazhit si kërcënime ekzistenciale, veçanërisht në raport me objektivin strategjik të Kinës për Tajvanin.
Pasoja për gatishmërinë ushtarake dhe Tajvanin
Megjithatë, disa ekspertë paralajmërojnë se dobësimi i niveleve të larta drejtuese mund të ndikojë negativisht në aftësinë operacionale të ushtrisë kineze në afat të shkurtër dhe të mesëm, duke ulur edhe rrezikun e një përshkallëzimi të menjëhershëm ushtarak në Ngushticën e Tajvanit.
Që nga vera e vitit 2023, më shumë se 50 zyrtarë të lartë ushtarakë dhe drejtues të industrisë së mbrojtjes janë hetuar ose shkarkuar, sipas të dhënave të përmbledhura nga Wall Street Journal.
