Prokuroria e Tiranës ka përfunduar hetimet dhe ka dërguar për gjykim gjashtë persona të akuzuar për organizimin e një skeme të trafikut të paligjshëm të emigrantëve drejt Shteteve të Bashkuara të Amerikës dhe Kanadasë, kundrejt pagesës prej 35 mijë euro për person.
Sipas dosjes hetimore, të pandehurit vepronin në bashkëpunim me njëri-tjetrin duke siguruar dokumente të falsifikuara dhe duke organizuar udhëtime përmes disa shteteve të Karaibeve dhe Porto Rikos, me qëllim përfundimtar hyrjen në territorin amerikan dhe kanadez.
Në këtë çështje janë marrë të pandehur: Hazir Maci, Lejla Maci, Çerkez Nikoci, Ardjan Pirani, Alfred Maci dhe Endrit Nezaj.
Hetimet tregojnë se Hazir Maci, i njohur edhe për përfshirje të mëparshme në veprimtari të ngjashme, ishte organizatori kryesor i skemës. Ai dyshohet se drejtonte aktivitetin kriminal edhe nga paraburgimi, duke komunikuar me bashkëpunëtorët përmes telefonave celularë.
Bashkëshortja e tij, Lejla Maci, dyshohet se ishte e përfshirë drejtpërdrejt në organizimin e udhëtimeve dhe në koordinimin e personave që kërkonin të largoheshin ilegalisht jashtë vendit. Në këtë aktivitet ishte përfshirë edhe vëllai i saj, Ardjan Pirani, i cili ndihmonte në menaxhimin e porosive dhe kontakteve.
Endrit Nezaj, punonjës në një agjenci turistike, akuzohet se siguronte foto dhe kopje dokumentesh të huaja, të cilat përdoreshin si modele për prodhimin e pasaportave dhe dokumenteve të falsifikuara.
Çerkez Nikoci, shofer automjeti, dyshohet se transportonte dokumentet false nga njëri person te tjetri, ndërsa Alfred Maci ka vënë në dispozicion pasaportën e tij britanike për t’u përdorur si model në prodhimin e dokumenteve të tjera të rreme.
Sipas Prokurorisë, të pandehurit përdornin dokumente të falsifikuara për të kaluar kufijtë dhe për të mashtruar autoritetet e huaja të emigracionit, duke siguruar udhëtime të organizuara për shtetas shqiptarë drejt SHBA-së dhe Kanadasë.
Gjashtë të pandehurit do të gjykohen për veprat penale të:
falsifikimit të dokumenteve,
falsifikimit të pasaportave dhe vizave,
ndihmës për kalim të paligjshëm të kufijve,
ndërsa Hazir Maci edhe për futje të sendeve të ndaluara në institucionet e vuajtjes së dënimit.
