Një ngjarje e rëndë familjare ka tronditur Greqinë, ku një 46-vjeçar ka vrarë babanë e tij 80-vjeçar në zonën e Glyfadës, në periferi të Athinës. Ky është krimi i dytë brenda së njëjtës familje, pasi i njëjti person kishte vrarë edhe nënën e tij në vitin 2014.
Sipas “Protothema”, autori dyshohet se e ka goditur të atin me thikë, duke i shkaktuar plagë fatale. Trupi i pajetë i të moshuarit u gjet nga policia në bagazhin e një automjeti të parkuar pranë banesës së tyre.
Ngjarja ndodhi në një shtëpi trekatëshe, ku 46-vjeçari jetonte me babanë e tij në katin e parë. Forcat e policisë greke mbërritën në vendngjarje pas njoftimeve të banorëve të zonës dhe gjetën trupin e viktimës të fshehur në automjet.
Sipas informacioneve paraprake, autori vuan nga probleme psikologjike dhe ishte i njohur për autoritetet edhe për ngjarjen tragjike të vitit 2014, kur kishte vrarë nënën e tij më 29 mars.
