Forcat izraelite kanë qëlluar për vdekje një palestinez në veri të Ramallahut, njoftoi Ministria palestineze e Shëndetësisë, teksa Izraeli po përshkallëzon dhunën në Bregun Perëndimor të pushtuar paralelisht me luftën në Gaza.
Sipas ministrisë, viktima është identifikuar si Ammar Hijazi, 34 vjeç, nga Nablusi. Agjencia zyrtare palestineze e lajmeve Ëafa raportoi se Hijazi u qëllua ndërsa po drejtonte një automjet.
Në një incident tjetër, ushtria izraelite ka ndaluar një fëmijë në fshatin Mukhmas, në Bregun Perëndimor qendror, sipas Ëafa-s.
Sulmet e ushtarëve dhe kolonëve izraelitë ndaj palestinezëve në Bregun Perëndimor janë intensifikuar kohët e fundit, në një kohë kur Izraeli po zgjeron vendbanimet në këtë territor, të cilat konsiderohen të paligjshme sipas së drejtës ndërkombëtare.
Kolonët, të cilët të dielën sulmuan një familje palestineze dhe plagosën një grua pranë Hebronit, janë inkurajuar nga qeveria e ekstremit të djathtë dhe po veprojnë me ndjenjë pandëshkueshmërie në tokat palestineze, shpesh me mbështetjen e ushtrisë, duke vrarë e plagosur civilë dhe duke shkatërruar pronat e tyre.
Ndërkohë, ministri izraelit i Sigurisë Kombëtare, Itamar Ben-Gvir, ka miratuar këtë javë lëshimin e lejeve për armë zjarri për izraelitët në 18 vendbanime të tjera në Bregun Perëndimor, teksa qeveria e kryeministrit Benjamin Netanyahu vijon përpjekjet për zgjerimin e postblloqeve të paligjshme, duke minuar perspektivën e një zgjidhjeje me dy shtete.
