Sekretari i Përgjithshëm i NATO, Mark Rutte, deklaroi se presidenti amerikan Donald Trump ka të drejtë kur flet për nevojën e mbrojtjes së Arktikut nga ndikimi në rritje i Kinës dhe Rusisë. Deklarata u bë gjatë një paneli në Forumi Ekonomik i Davosit.
Rutte theksoi se rrugët detare në Arktik po hapen gjithnjë e më shumë dhe se Kina dhe Rusia po rrisin praninë e tyre në këtë rajon strategjik. Sipas tij, nga tetë vendet që kufizohen me Arktikun, shtatë janë anëtare të NATO-s, ndërsa Rusia është i vetmi shtet jashtë aleancës që ka kufij në këtë zonë. Ai shtoi se Kina, edhe pse nuk ka kufij të drejtpërdrejtë, po shfaqet si një “aktor i nëntë” gjithnjë e më aktiv në Arktik.
“Presidenti Trump ka të drejtë, ashtu si edhe udhëheqës të tjerë të NATO-s. Ne duhet të bëjmë më shumë dhe ta mbrojmë Arktikun nga ndikimi rus dhe kinez”, u shpreh Rutte, duke nënvizuar se aleanca tashmë ka nisur punën konkrete për forcimin e sigurisë në këtë rajon.
Kreu i NATO-s vuri në dukje gjithashtu se presioni i ushtruar nga Trump ka pasur ndikim të drejtpërdrejtë te aleatët evropianë, duke bërë që vende si Spanja, Italia dhe Belgjika të afrohen me objektivin e shpenzimeve prej 2% të Prodhimit të Brendshëm Bruto për mbrojtjen deri në vitin 2025. Ai përmendi Poloninë si një nga aleatët më të afërt të SHBA-së dhe foli për vështirësitë që hasen në prodhimin e pajisjeve ushtarake.
Ndërkohë, edhe Donald Trump mbajti një fjalim në Davos, ku kritikoi Europën për drejtimin që po ndjek. Ai deklaroi se ka respekt për popujt e Groenlandës dhe Danimarkës, por sipas tij, vetëm SHBA-të mund të garantojnë sigurinë e tyre. Trump theksoi se synon negociata të menjëhershme për blerjen e Groenlandës, duke përjashtuar ndërhyrjen ushtarake.
