Shqiptari i vrarë sot në burgu e Koridhalos është një emër i njohur i botës së krimit në Shqipëri.
Ai është Jani Aliaj i dënuar me burgim të përjetshëm për vrasjen e bujshme të Elton Çiços, ngjarje e ndodhur më 1 maj 2016 në zonën e ish-Bllokut në Tiranë.
49-vjecari nga Tepelena, i cili ndodhej i arrestuar në Greqi prej 31 dhjetorit 2024, është vrarë duke u goditur me thikë nga një i burgosur grek në sektorin 3 të burgut.
Edhe autori, ashtu si Aliaj, rezulton i dënuar për vrasje.
Ngjarja në zonën e ish-Bllokut në Tiranë
Ngjarja ndodhi në një lokal të frekuentuar, ku Aliaj qëlloi për vdekje Elton Çiços përpara klientëve të tjerë. Sipas hetimeve, vrasja ishte e mirëorganizuar dhe e paramenduar, duke ngritur dyshime për motive hakmarrjeje dhe përplasje të mëparshme mes palëve. Viktima ndërroi jetë në vend, ndërsa autori u largua menjëherë nga Shqipëria.
Hetimet zbuluan se konflikti mes Jani Aliajt dhe Elton Çiços kishte rrënjë të vjetra, të lidhura me botën e krimit dhe episode të mëparshme përplasjesh, përfshirë edhe kohën kur të dy kishin qenë të burgosur në Greqi. Prokuroria argumentoi se vrasja ishte pjesë e një zinxhiri hakmarrjesh mes grupeve kriminale.
Pas krimit, Jani Aliaj u shpall në kërkim ndërkombëtar dhe qëndroi për disa vite i fshehur jashtë Shqipërisë. Ai u arrestua në Greqi, ku jetonte me identitet të rremë dhe dokumente të falsifikuara. Kapja e tij u bë falë bashkëpunimit mes autoriteteve greke dhe Interpol Tirana, duke i dhënë fund arratisjes disa-vjeçare.
Gjykata shqiptare e shpalli fajtor Jani Aliajn për vrasje me paramendim dhe e dënoi me burgim të përjetshëm. Përveç kësaj vepre, ndaj tij rëndojnë edhe akuza të tjera penale, përfshirë armëmbajtje pa leje, tentativa vrasjeje dhe përfshirje në aktivitete kriminale, çka e ka forcuar profilin e tij si një person me rrezikshmëri të lartë shoqërore.
