Pas disa vendeve evropiane, edhe Kanada po shqyrton mundësinë e dërgimit të një force të vogël ushtarake në Groenlandë, për të marrë pjesë në stërvitjet ushtarake të NATO.
Lajmi është raportuar fillimisht nga CBC News dhe gazeta Globe and Mail, sipas të cilave zyrtarët ushtarakë kanadezë i kanë paraqitur planet qeverisë dhe janë në pritje të miratimit përfundimtar nga kryeministri Mark Carney.
Sipas burimeve të njohura me çështjen, vendimi përfshin dërgimin e një numri të kufizuar trupash, në kuadër të përgatitjeve për stërvitjet e NATO-s që pritet të zhvillohen më vonë gjatë këtij viti në rajonin e Arktikut.
Situata e vendos kryeministrin Carney në një pozicion delikat, për shkak të kërcënimeve të përsëritura të presidentit të SHBA-së, Donald Trump, për pushtimin e Groenlandës. Nga njëra anë, Otava kërkon të tregojë solidaritet me aleatët evropianë, ndërsa nga ana tjetër synon të ruajë marrëdhënie të qëndrueshme me Uashingtonin, në një kohë kur Trump ka lënë të kuptohet më herët edhe për aneksimin e Kanadasë.
“Jemi të shqetësuar për këtë përshkallëzim. Për të qenë të qartë, ne gjithmonë kemi mbështetur pavarësinë kombëtare dhe integritetin territorial të vendeve, kudo që ndodhen ato”, deklaroi Carney për gazetarët në Doha, gjatë një vizite zyrtare.
Ndërkohë, javën e kaluar, disa vende evropiane kanë dërguar tashmë personel ushtarak në Groenlandë. Gjermani, Francë, Suedi, Norvegji, Finlandë dhe Holandë kanë konfirmuar se po dërgojnë trupa për t’u përgatitur për stërvitjet ushtarake që do të mbahen më vonë këtë vit në territorin arktik.
BREAKING: Canada is preparing to deploy troops to Greenland for joint exercises with NATO partners.
Officials say the deployment is pending final approval from Prime Minister Mark Carney.
(Source: The Globe and Mail) pic.twitter.com/kXouMH9X8q
— YEGWAVE (@yegwave) January 18, 2026
