Një foshnjë vetëm 27 ditëshe ka ndërruar jetë në Gaza si pasojë e të ftohtit ekstrem, duke nxjerrë edhe një herë në pah gjendjen e rëndë humanitare në rajon.
Sipas burimeve mjekësore dhe Ministrisë së Shëndetësisë së Gazës, foshnja, e identifikuar si Aisha Ayesh al-Agha, u dërgua për ndihmë mjekësore në spital në qytetin Khan Younis, në jug të Rripit të Gazës, por fatkeqësisht mjekët nuk arritën ta shpëtonin, pasi ajo kishte ndërruar jetë nga hipotermia.
Me këtë rast, numri i fëmijëve që kanë humbur jetën nga i ftohti në Gaza që nga fillimi i sezonit të dimrit ka shkuar në tetë, sipas të dhënave zyrtare të shërbimeve shëndetësore lokale.
Mediat e huaja raportojnë se stuhitë e dimrit, temperaturat e ulëta dhe mungesa e strehimit të përshtatshëm kanë përkeqësuar ndjeshëm kushtet e jetesës për qindra mijëra banorë të Rripit të Gazës. Shumë familje jetojnë në tenda apo kampe të improvizuara, pa mbrojtje minimale nga të ftohtit.
Situata rëndohet edhe më tej nga mungesa e karburantit, veshjeve të ngrohta dhe materialeve për ngrohje, duke e bërë mbijetesën gjatë dimrit veçanërisht të vështirë për foshnjat dhe fëmijët e vegjël.
Ndërkohë, kufizimet në hyrjen e ndihmës humanitare, furnizimeve mjekësore dhe materialeve bazë, pavarësisht armëpushimit që hyri në fuqi në muajin tetor, kanë shtuar rrezikun për grupet më të cenueshme të popullsisë, duke e thelluar më tej krizën humanitare në Gaza.
