Më shumë se 50 familje të lagjes Xhaferra–Turaj, në aksin që lidh Kukësin me Shishtavecin dhe Topojanin, janë të izoluara prej dhjetë ditësh pas një rrëshqitjeje masive të rrugës.
Problemet nisën pas reshjeve të dendura të ditëve të para të janarit, të cilat shkaktuan shembjen e shtratit rrugor dhe ndërprenë qarkullimin e automjeteve.
Prej asaj dite, banorët detyrohen të lëvizin në këmbë në një zonë të dëmtuar dhe të pasigurt, duke rrezikuar çdo kalim.
Situata ka vështirësuar të gjitha aspektet e jetës së përditshme, nga transporti i mallrave dhe furnizimeve, deri te dërgimi i fëmijëve në shkolla dhe kopshte.
