Përmbytjet e ditëve të fundit në Durrës kanë goditur rëndë edhe bizneset e vogla, mes tyre një rrobaqepësi në zonën e Plazhit që u shkatërrua plotësisht nga uji.
Pronarja, nënë e vetme e tre fëmijëve, tregon se mbeti pa asnjë mjet pune dhe pa asnjë burim të ardhurash.
Makineritë e qepjes, pajisjet dhe çdo material që ajo përdorte për të mbajtur familjen u dëmtuan nga uji.
Ajo tregon se inspektorët e bashkisë i kanë bërë me dije se dëmet e bizneseve nuk do të përfshihen në vlerësimin zyrtar, pasi lista do të llogarisë vetëm dëmtimet në banesa dhe pajisjet shtëpiake.
“Unë ushqeja 3 fëmijë me këtë rrobaqepësi. Prej tre vitesh punoja vetëm, pa asnjë ndihmë nga shteti apo nga babai i fëmijëve. Qepja dhe pastroja nëpër shtëpi. Tani nuk më ka mbetur asgjë”, u shpreh ajo për mediat.
