Mediat britanike kanë rikthyer në vëmendje emrin e shqiptarit Dorian Puka, 31 vjeç, i cili vazhdon të bëjë jetë luksi në Londër pavarësisht se është i dënuar, i deportuar dy herë dhe aktualisht ka kërkuar azil.
Gazeta “The Telegraph” raporton se Puka po tall autoritetet britanike duke postuar publikisht video nga klubet më të famshme të Londrës, ku shfaqet duke hedhur kartëmonedha mbi vajza dhe duke festuar mes shampanjës së shtrenjtë.
Në videon më të fundit, e publikuar të mërkurën, ai shihet në klubin London Reign në Mayfair. Javën e kaluar frekuentoi Cirque le Soir, gjithashtu në Mayfair, duke festuar në zonën VIP me performues burleske.
Autoritetet britanike e cilësojnë rastin si “sfidë të hapur ndaj sistemit”, pasi Puka:
është dënuar dy herë për grabitje shtëpish,
është dëbuar dy herë nga vendi,
por ka hyrë ilegalisht në Britani çdo herë pas deportimit.
Ministria e Brendshme britanike ka pranuar se nuk mund ta deportojë derisa të shqyrtohet kërkesa e tij për azil, duke shkaktuar reagime të forta publike.
“The Telegraph” thekson se Puka:
ka postuar një Ferrari, një Lamborghini 190,000 £,
mban të paktën gjatë orë Rolex me vlerë rreth 162,500 £,
dhe ka paraqitur koleksione makinash si Porsche, Bentley, Mercedes G-Wagon dhe Jaguar.
Një burim i imigracionit i tha gazetës:
“Është e turpshme të shohësh një kriminel ilegal duke bërë jetë luksi, ndërsa mijëra britanikë punojnë me ndershmëri dhe mezi mbijetojnë.”
Puka është gjithashtu i njohur për përdorimin e një telefoni të futur fshehurazi në burg, duke postuar foto në Instagram edhe kur vuante dënimin e tij të dytë.
Pas deportimit në vitin 2020, ai ka udhëtuar nëpër Evropë dhe është rikthyer sërish fshehurazi në Britani, ku vazhdon jetën luksoze dhe sfidën publike ndaj autoriteteve britanike.
Ministria e Brendshme deklaron se qeveria po ndërmerr reforma për të përshpejtuar deportimet dhe shtrënguar rregullat për azilkërkuesit që kanë precedent penal.
