Presidenti i Serbisë, Aleksandër Vuçiç, ka reaguar ashpër ndaj arrestimit të presidentit venezuelian Nicolás Maduro, duke deklaruar se “rendi botëror ka rënë” dhe se sot në marrëdhëniet ndërkombëtare po dominon “ligji i më të fortit”.
Deklaratat Vuçiç i bëri pas një mbledhjeje urgjente të Këshillit të Sigurisë Kombëtare, ku tha se veprimet e SHBA-së në Venezuelë tregojnë qartë se rendi ndërkombëtar dhe Karta e OKB-së nuk po respektohen më.
“Pas asaj që ndodhi në Venezuelë, është e qartë se nuk ka më parime. Sot sundon ligji i forcës dhe ligji i më të fortit”, u shpreh Vuçiç.
Presidenti serb lidhi zhvillimet në Venezuelë me shqetësimet e Serbisë për sigurinë në rajon, duke theksuar se Beogradi është veçanërisht i alarmuar nga armatosja e Prishtinës, të cilën e cilësoi në kundërshtim me Rezolutën 1244 të OKB-së.
Sipas tij, Prishtina po armatoset me shpejtësi, me mbështetje të drejtpërdrejtë nga Turqia, ndërsa kjo situatë përbën rrezik për Serbinë. Vuçiç tha se reagimi i Bashkimi Europian ndaj ngjarjeve në Venezuelë tregon, sipas tij, se BE ka “interesa të vogla” dhe se aktualisht është më e shqetësuar për çështje të tjera, si Groenlanda.
Ai foli gjithashtu për atë që e cilësoi si një kërcënim serioz për sigurinë e Serbisë: bashkëpunimin mes Prishtinës, Tiranës dhe Zagrebit në fushën ushtarake, duke përfshirë zhvillimin e përbashkët të sistemeve luftarake dhe armatimeve.
“Serbia po e ndjek me vëmendje këtë situatë dhe po përgatitet për t’u mbrojtur. Forca jonë do të jetë një pengesë e mjaftueshme ndaj atyre që sot na kërcënojnë hapur”, deklaroi Vuçiç.
