Qyteti i Gjirokastrës po përballet me trafik të shtuar gjatë ditës së sotme, si pasojë e kthimit të emigrantëve për festat e fundvitit.
Lëvizja e automjeteve është rënduar ndjeshëm në hyrje-daljet e qytetit dhe në akset kryesore, duke krijuar radhë të gjata dhe vonesa për drejtuesit e mjeteve.
Fluksi i madh i automjeteve ka sjellë vështirësi në qarkullim, ndërsa shumë drejtues janë detyruar të presin për minuta të tëra për të kaluar zona të caktuara të qytetit.
Gjatë kësaj periudhe festive, vendi është kthyer në një kaos të vërtetë sa i përket trafikut. Qytetarët ankohen se presin me orë të tëra në rrugë, ndërsa prania e policisë në terren shpeshherë nuk e lehtëson situatën, por përkundrazi e përkeqëson atë, për shkak të mungesës së një menaxhimi të qartë dhe koordinimi të duhur të qarkullimit.
