Gjykata e Posaçme shtyu për më 15 janar seancën gjyqësore ndaj të pandehurve të dosjes “Plumbi i artë”.
Shkak i shtyrjes u bë mungesa e avokatëve të dy prej të penduarve në proces.
Ky shqyrtim gjyqësor ndodhet në fazën e pyetjes së dëshmitarëve të kërkuar nga SPAK.
Dosja “Plumbi i Artë”
Dosja “Plumbi i Artë” është një nga çështjet më të bujshme të drejtësisë shqiptare, e lidhur me atentate të armatosura dhe rrjetet e krimit të organizuar. Ajo ka tërhequr vëmendjen e publikut për shkak të dëshmive tronditëse dhe përfshirjes së personazheve të njohur në botën e biznesit dhe të krimit.
Në këtë dosje, Gjykata e Posaçme kundër Korrupsionit dhe Krimit të Organizuar (GJKKO) po shqyrton një sërë ngjarjesh të rënda, ku përfshihen atentate ndaj biznesmenëve dhe konflikte të hershme mes individëve të fuqishëm.
Një nga dëshmitarët kryesorë është Lulzim Masha, pronar i një shkolle private në Tiranë, i cili rrëfeu momentet kur i shpëtoi një atentati me armë në mes të qytetit.
Ai theksoi se nuk kishte asnjë konflikt apo borxh me dikë, duke e cilësuar ngjarjen si një sulm të papritur, ku falë fatit arriti të mbijetonte pa lëndime. Për këtë episod akuzohet se u angazhua vrasësi me pagesë Skerdi Tasi, i cili më pas u kthye në bashkëpunëtor të drejtësisë, duke zbuluar detaje të brendshme të organizimit të atentatit.
Një tjetër dëshmitar i rëndësishëm është Aredin Behari, i cili ka shpëtuar nga dy atentate në vitet 2017 dhe 2019. Ai deklaroi para gjykatës se ishte i bindur se sulmet ishin të organizuara nga vëllezërit Ardian dhe Albert Pashaj, për shkak të një konflikti të hershëm mbi një apartament.
Behari tregoi se në njërin prej atentateve arma e atentatorit ngeci, duke i dhënë mundësinë të shpëtonte.
