Nga Boldnews.al
Skandalet më të fundit në kupolën e lartë të qeverisë, me të superfuqishmen Belinda Balluku në prag arresti, apo batërdia me taksat qytetare të AKSHI-t, (mënyra e abuzimit mjaft e rëndë), janë arsye më shumë se të mjaftueshme për tu revoltuar dhe kërkuar përbysje të një pushteti, ndryshim, apo edhe garanci që ai që pason atë që bie, të mos ketë asnjë ngjashmëri.
Kauzat ulërasin, revolta është e madhe, por grimcë zëri se nxjerr kush. Vetë aktorët e zënë në faj janë në një pikë që po kërkojnë të ikin për të ruajtur veten, por populli i mban, i do, i vlerëson deri në ardhurim, ndonëse e dinë se u kanë marrë jo vetëm atë copëz pasuri, por edhe të ardhmen e fëmijëve.
Zëvendëskryeministrja Belinda Balluku, për të cilën Prokuroria Speciale SPAK ka kërkuar autorimim në Parlament për masën e arrestit, drekën e Krishtlindjeve vendosi ta kalojë në Lushnje, duke postuar edhe një foto në dukje familjare, të thjesht dhe gëzueshme.
Një propagandë e ngjashme me parimin e agjit-propit komunist, apo PR të sotëm, kur shtresa e lartë ulej gju më gju me popullin. Pa kaluar as 24 orë, më shumë se 12 mijë pëlqime erdhën për të. Shumë komente që i jepnin kurajo e mjaft të tjera që e vlerësonin si “gjigante” (e madhe)!
Balluku presupozohet e pafajshme derisa të shprehet gjykata me vendim të formës së prerë, por lugunia e komenteve pozitive dhe likeve (pëlqimeve), është një eksperiment social që duhet marrë fort në konsideratë, madje në studim nga psikoanalistë, politologë por edhe filozofë, (jo nga tanët, por të huaj).
Disa mund të mendojnë se janë thjesht disa nëpunës të shtetit, apo bashkëpunëtorë të saj që mund të kenë ngjyer qoftë edhe majat e gishtave në kazanin e yndyrshëm (edhe atë gisht që preku ikonën ‘like’ nën pamjen Ballukiane). Kjo mund ta jetë pjesërisht e vërtetë ndonëse asgjë nuk e justifikon adhurimin për politikanë që ikin e vijnë duke rrëmbyer bashkë me buzhetin jetën e çdo qytetari.
Mjaftojnë edhe disa mesazhe me fjalor të rëndë të dala nga shpirti goja dhe ndërgjegja e Ballukut si: “super kurva”, ai k…, “palloshi i gjatë”, etj, që askush qytetar normal të mos e qaste, e aq më pak që me fytyrën e tyre të bëheshin pëlqyes të saj. Po ashtu mënyra sesi flet për taksat qytetare, duke ia kaluar shuma të frikshme biznesmenëve pranë pushtetit që i cilëson si “ushtarë”, tepron për ta përbuzur formën qeverisëse të saj e cila drejtëpërdrejtë ka ndikuar në skamjen sa materiale aq edhe shpirtërore.
Po perse e duan këtë racë hajnie të veshur me pushtet? Ndoshta arsyeja duhet gjetur në rrënjët tona si komb. Edhe kur vetë Perandoria Osmane ra, ne ishim të fundit që fituam një copë pavarësi të cunguar, ndërsa pa u tharë boja e deklaratës së pavarësisë, një pjesë e popullit të thjesht, nisi revolën e kapi pushkën në atë që njihet së “lëvizja Qamiliste”, nën moton: “Dum Babën”, duke iu referuar Sulltanit.
Sot është një “sultan modern” mistret si konkubine dhe ministrat si eunukë të babëzitur nga grabitja e parasë publike po shembet por duart plot kallo e vuajtje ende po i mbajnë, po me moton: “Dum Babën, edhe kur ‘baba e ka djegur vendin.
Paradoksalisht, 112 vite më vonë, ende duan “babën”, këtë “babë” që po vetëbie pikërisht nga grabitja, lidhja me krimin dhe aferat që kapërcejnë çdo imagjinatë. Sulltani po bie, por “dumbabistët” po e mbajnë!
