Një shtetas shqiptar i shpallur në kërkim nga Interpol Tirana është arrestuar nga policia greke në pikën e kalimit kufitar të Kakavijes, teksa tentonte të hynte në territorin shqiptar.
Sipas autoriteteve, gjatë verifikimit të dokumenteve në sistem, rezultoi se shtetasi ishte i dënuar nga drejtësia shqiptare me 4 muaj burg për veprën penale të falsifikimit të dokumenteve.
Pas konstatimit të masës së kërkimit ndërkombëtar, ai u ndalua nga policia greke dhe materialet procedurale iu referuan Prokurorisë së Janinës për vijimin e procedurave të ekstradimit drejt Shqipërisë.
Ndërkohë, po në pikën kufitare të Kakavijes, janë arrestuar edhe dy shtetas të tjerë shqiptarë, të cilët rezultonin të kërkuar nga autoritetet greke.
Sipas burimeve zyrtare, njëri prej tyre ishte i dënuar nga Gjykata e Athinës me 3 vite burg për veprën penale të shmangies së taksave, ndërsa tjetri ishte shpallur në kërkim nga Prokuroria e Kilkisit për veprën penale të ryshfetit.
