Gazetarja Ola Xama, ka ngritur shqetësime mbi mënyrën se si janë planifikuar dhe shpërndarë shpenzimet kapitale të buxhetit të shtetit për vitin 2026.
Në një postim në rrjete sociale, Xama ka nxjerrë tabelën, krahas së cilës shkruan se përqendrimi i fondeve më të mëdha publike është vënë në dispozicion të institucioneve që drejtohen nga zyrtarë që janë të pandehur.
Ajo rendit tre nga institucionet të cilat gjenerojnë më shumë të ardhura sipas tabelës ( Ministria e Infrastrukturës dhe Energjisë, Fondi Shqiptar i Zhvillimit dhe AKSHI) titullarët e të cilëve janë nën hetim, ndërsa ngre pikëpyetje serioze për mënyrën se si po qeveriset vendi dhe kush mban përgjegjësi për këtë situatë.
“Për vitin 2026 vlera totale e shpenzimeve kapitale është 1.26 miliard euro. Gjysma e këtij fondi, 562 milionë euro, është vënë në dispozicion të Ministrisë së Infrastrukturës dhe Energjisë. Titullari i këtij institucioni është marrë i pandehur me akuzën “shkelje e barazisë në tendera”.
Institucioni i dytë që ka vlerën më të madhe të prokurimeve është Fondi Shqiptar i Zhvillimit me 197 milionë euro shpenzime të planifikuara për vitin e ardhshëm, dhe me vlerë totale projektesh 808 milionë euro. Disa procedura prokurimi të këtij institucioni janë duke u hetuar nga SPAK, ndërsa ish-kreu i FSHZH është marrë zyrtarisht nën hetim për manipulim të garës në një tjetër procedurë kur ka qenë drejtues i KESH. Aktualisht drejton Bashkinë Shkodër.
Agjencia e tretë që ka vlerën më të madhe të prokurimeve është ajo e Shoqërisë së Informacionit (AKSHI) me shpenzime kapitale 67 milion euro për vitin 2026 dhe vlerë projektesh 256 milion euro. Drejtuesja e këtij institucioni është në arrest shtëpie për “shkelje të barazisë në tendera” dhe “grup të strukturuar kriminal”.
Të gjithë zyrtarët në fjalë janë në detyrë dhe do të marrin vendime për menaxhimin e parave publike, të cilat përbëjnë shumicën e shpenzimeve kapitale të buxhetit. Pyetja që lind është se si ka mundësi që e gjithë struktura e zyrtarëve që menaxhojnë interesat më të mëdha ekonomikë është e kriminalizuar?
A ka ndonjë përgjegjësi për këtë situatë kryeministri? Po Partia Socialiste që është votëbesuar nga shqiptarët a ka përgjegjësi? Si ka mundësi që nuk ka asnjë kritik brenda kësaj force për të kërkuar llogari mbi mënyrën se si po qeveriset vendi?”,- shkruan Xama.
