Prokuroria e Shkodrës ka dërguar në gjyq katër persona, të akuzuar se përmes një faqeje interneti premtonin se jepnin makina me qira, merrnin paratë dhe më pas zhdukeshin.
Sipas organit të akuzës, shtetasit Arsid Kurtaj dhe Orest Kurtaj akuzohen për veprën penale “Mashtrimi”, e kryer në bashkëpunim dhe në mënyrë të përsëritur.
Ndërkohë, shtetasja M.P. dhe shtetasi A.K. do të përballen me akuzat për “Falsifikimi i vulave, i stampave ose i formularëve”, po ashtu të kryera më shumë se një herë.
Sipas hetimeve Arsid Kurtaj dhe Orest Kurtaj kishin krijuar në mënyrë fiktive faqen “Autorental Tirana”, ku reklamonin automjete për qira.
Për komunikim me klientët, ata përdornin një numër telefoni të regjistruar në emër të një personi të tretë, pa dijeninë e tij. Pasi merrnin pagesat nga qytetarët që rezervonin automjetet, mjetet nuk dërgoheshin kurrë.
Prokuroria sqaron se M.P., punonjëse pranë subjektit “F.K” PF, ka ndihmuar skemën duke regjistruar numrin celular në emër të një personi tjetër, pa autorizim.
Ndërkohë, i pandehuri A.K., administrator i subjektit “ERGI-2012”, që ushtron aktivitet edhe në fushën e transfertave të parave, dyshohet se ka nënshkruar formularë tërheqjeje shumash, duke u paraqitur si përfitues i pagesave të dërguara nga qytetarët që mendonin se po merrnin automjete me qira.
