Prokuroria e Posaçme ka kërkuar zyrtarisht Kuvendit heqjen e imunitetit të zv/kryeministres Belinda Balluku, me qëllim arrestimin e saj, duke e çuar në një fazë të re procesin hetimor që prej javësh ishte në vëmendjen publike.
Eksperti i kriminalistikës, Ervin Karamuço, u shpreh në emisionin “Top Story” se kjo kërkesë erdhi si pasojë e një urgence të krijuar pas vendimit të Gjykatës Kushtetuese për rikthimin e Ballukut në detyrë.
Sipas tij, hetimet kanë vijuar dhe kanë nxjerrë në pah episode të tjera që kanë ndikuar në vendimmarrjen e SPAK.
“Gërmo, gjej prova, krijo fraksion, bëj kërkesë. Prandaj kemi aq shumë fraksione në shumë prej dosjeve, sepse vijon ende hetimi.
Ky vijim ka nxjerrë episode të tjera, por nga ana tjetër ka pasur një urgjencë pas vendimit të Gjykatës Kushtetuese.
SPAK-u e gjykoi që ta hiqte nga zyra për të mos dëmtuar prova, por të mos largohej për të mos ikur provat. Në atë institucion, ministrinë që drejton zonja Balluku, ka persona që mund të thirren nesër.
Tani është gjetur alternativa që ne e përmendëm dje. Ne nuk e prisnim të ndodhte kaq shpejtë”, tha ndër të tjera Karamuço.
