Teksa krahu i tij i djathtë, zv.kryeministrja e pezulluar Belinda Balluku, ndodhet nën hetim nga SPAK, kryeministri Edi Rama ka uruar kreun sapozgjedhur të këtij institucioni, Klodian Braho.
Në një postim në platformën “X”, Rama shprehu urimet për drejtuesin e sapozgjedhur të SPAK-ut, duke nënvizuar mbështetjen e tij dhe të mazhorancës për institucionin që, paradoksalisht, po heton disa nga figurat më të larta të qeverisë së tij.
“Punë të mbarë drejtuesit të ri të SPAK-ut, i cili u zgjodh sot mes katër kandidatësh për të çuar më tej punët e mandatit të tretë të institucionit, duke marrë stafetën nga drejtuesi aktual, që meriton përgëzime për arritjet e pamohueshme të SPAK-ut në tre vitet e drejtimit të tij.
SPAK ka pasur, ka dhe do të ketë mbështetjen e palëkundur të shumicës sonë qeverisëse, për të përmbushur në pavarësi e kushte optimale misionin e vet,” – shkroi Rama.
