Austria ka miratuar një ligj të ri që ndalon mbajtjen e shamisë së kokës për vajzat nën moshën 14 vjeç në të gjitha shkollat e vendit. Vendimi, i cili pritet të hyjë në fuqi në shtator 2026, ka ndezur menjëherë debate të forta politike, juridike dhe shoqërore.
Koalicioni qeverisës, i përbërë nga ÖVP, SPÖ dhe Neos, e ka cilësuar ligjin si një “angazhim për barazinë gjinore” dhe si përpjekje për të mbrojtur vajzat nga çdo formë presioni apo shtypjeje. Megjithatë, kritikët e kanë quajtur masën jokushtetuese dhe diskriminuese ndaj komunitetit mysliman.
Ligji ndalon mbulesat tradicionale islame si hixhabi dhe burka për vajzat nën 14 vjeç në shkollat publike e private. Në rast shkeljeje, nxënëset do të thirren për bisedë me drejtuesit e shkollës dhe prindërit, ndërsa përsëritja e rastit mund të sjellë ndërhyrjen e shërbimeve sociale ose gjobë deri në 800 euro për familjen. Qeveria vlerëson se rreth 12 mijë nxënëse do të preken nga ndalimi.
Shefi parlamentar i Neos, Yannick Shetty, deklaroi se ligji “nuk është kundër fesë, por për lirinë individuale”. Nga ana tjetër, partia e djathtë ekstreme FPÖ kërkoi ndalim të plotë të shamive për nxënëset dhe mësueset, duke thënë se “islami politik nuk ka vend në shkolla”. Ndërkohë, të Gjelbrit në opozitë e cilësuan ligjin “qartësisht jokushtetues”, duke kujtuar se në vitin 2020 Gjykata Kushtetuese kishte rrëzuar një ndalim të ngjashëm për vajzat nën 10 vjeç.
Bashkësia Islame në Austri (IGGÖ) reagoi ashpër, duke akuzuar qeverinë për shkelje të të drejtave themelore dhe për nxitje të ndarjeve shoqërore. Ajo njoftoi se po shqyrton mundësinë e ankimimit të ligjit në Gjykatën Kushtetuese.
