Luçiano Boçi, foli për 8 dhjetorin Ditën e Rinisë dhe Lëvizjen e Studentëve të Dhjetorit, duke e krahasuar realitetin e sotëm politik me atë të viteve ’90.
“Sfidat ngjajnë me njëra-tjetrën. Nëse ne kishim një diktaturë klasike para viteve ’90, sot ka një pamje më moderne, më të stilizuar… Por në thelbin e vet nuk ndryshojnë fare. Mund ta quajmë këtë të sotmen autokraci,” – u shpreh Boçi.
Ai theksoi se brenda partive politike ka lodhje nga mënyra e drejtimit, duke nënvizuar se PD mbështetet tek zgjedhja e lirë, ndryshe nga partia në pushtet.
Boçi akuzoi qeverinë se ka përdorur të gjitha format për të goditur opozitën, duke e cilësuar këtë si një regjim që synon asgjësimin e PD-së.
“Opozita është përballur me sulme masive. Sulmi ndaj PD-së ishte i paparë, ndoshta dhe i pamenduar,” –tha ai.
Duke u ndalur tek roli i ish-kryeministrit Sali Berisha, Boçi e cilësoi rikthimin e tij në krye të PD-së si të pashmangshëm për mbijetesën e partisë.
“Ardhja e Berishës në krye të PD ka qenë domosdoshmëri. Në 2013 ai u largua me një akt burrëror. Sot opozita luftohet me të gjitha mjetet për ta luftuar atë. Rikthimi i Berishës ishte domosdoshmëri për ta shpëtuar PD-në,” – u shpreh Boçi.
