Gjermania ka paralajmëruar ashpërsimin e masave kundër sulmeve hibride, duke dërguar një mesazh të qartë ndaj Rusisë. Ministri i Brendshëm gjerman, Alexander Dobrindt, deklaroi se vendi po përballet çdo ditë me një valë të paparë sulmesh kibernetike, sabotimesh dhe zjarrvëniesh që, sipas tij, janë pjesë e një strategjie të qëllimshme për destabilizim.
“Po përjetojmë sulme kibernetike, anashkalimin e sanksioneve, zjarrvënie – të gjitha në një shkallë që nuk e kemi parë kurrë më parë. Gjermania është shënjestër e sulmeve hibride çdo ditë,” u shpreh Dobrindt.
Ai theksoi se këto sulme përbëjnë një “test stresi” për demokracinë gjermane dhe paralajmëroi se Berlini do të ashpërsojë ndjeshëm reagimin e tij ndaj çdo akti agresioni dixhital.
“Kushdo që na sulmon në hapësirën kibernetike duhet të jetë i vetëdijshëm: ne do të mbrohemi në të ardhmen! Mos harroni, dimë edhe ne të sulmojmë e të shkatërrojmë,” theksoi ministri gjerman, duke dërguar një sinjal të fortë paralajmërues.
Edhe drejtori i Policisë Federale Kriminale, Holger Munch, paralajmëroi se demokracia është nën presion si nga jashtë, ashtu edhe nga brenda. Ai vuri në dukje se kërcënimet hibride po synojnë të minojnë besimin publik dhe stabilitetin e institucioneve demokratike.
Në këtë kontekst, qeveria gjermane ka miratuar së fundmi një vendim që i jep Bundeswehrit (ushtrisë gjermane) të drejtën për të rrëzuar dronë që hyjnë në hapësirën ajrore të vendit, si pjesë e masave të reja mbrojtëse kundër ndërhyrjeve të huaja.
