Këngëtarja amerikane Katy Perry dhe ish-kryeministri kanadez Justin Trudeau kanë bërë hapin e radhës në marrëdhënien e tyre, duke u deklaruar zyrtarisht në Instagram pas publikimit të një galerie fotosh dhe videosh nga vizita e tyre në Japoni.
Në një nga fotot, Perry dhe Trudeau shfaqen duke buzëqeshur në një selfie me fytyrat afër njëri-tjetrit, ndërsa në një video të shkurtër shihen duke provuar sushi. As këngëtarja dhe as Trudeau nuk kanë folur publikisht për lidhjen e tyre, por thashethemet kanë qarkulluar prej muajsh, të ushqyera nga disa paraqitje të përbashkëta.
Trudeau ishte parë në një nga koncertet e Perry më herët këtë vit, duke shtuar dyshimet për një romancë mes tyre. Vizita e këngëtares në Japoni ishte pjesë e turneut të saj botëror Lifetimes Tour.
Edhe Trudeau, 53 vjeç, disa ditë më parë kishte ripostuar një foto ku shfaqej me Perry-n dhe ish-kryeministrin japonez Fumio Kishida, së bashku me bashkëshorten e tij, Yuko. Në një postim në X, ai i falënderoi për mikpritjen dhe “angazhimin e vazhdueshëm për një rend ndërkombëtar të bazuar në rregulla”.
Më herët, muajin e kaluar, dyshja dukej se konfirmoi romancën kur u fotografuan duke u kapur për dore në një event në Paris, një paraqitje që përkoi edhe me ditëlindjen e 41-të të Perry. Videoja e publikuar nga TMZ i tregonte teksa futeshin në një makinë, me Trudeau që e ndihmonte këngëtaren të hipte në sediljen e pasme.
Gjatë një koncerti në Londër, Perry la të kuptohej për statusin e saj, kur i tha me shaka një fansi që i propozoi nga audienca.
“Do doja të ma kishe thënë 48 orë më parë”, vetëm pak ditë pasi fotot me Trudeau dolën në media.
Perry më parë ka qenë në një marrëdhënie afatgjatë me aktorin Orlando Bloom, me të cilin ka një vajzë. Çifti u nda gjatë verës. Edhe Trudeau ka qenë i martuar për 18 vite me Sophie Grégoire, me të cilën ka tre fëmijë. Ata u ndanë në verën e vitit 2023.
