Deputetja e PD-së Jorida Tabaku, akuzoi sot në Kuvend qeverinë Rama se gjatë 12 viteve në pushtet ka ngritur një sistem të mbyllur dhe të korruptuar, që funksionon vetëm në interes të klientelës së pushtetit dhe jo të qytetarëve.
Sipas Tabakut, qeveria ka krijuar një ekonomi të pakicës, duke lënë pas shumicën e qytetarëve dhe duke prodhuar varfëri në vend të zhvillimit.
Ajo deklaroi se çdo ligj i miratuar në Kuvend mban shenja të “keqbërjes sistemike” që, siç u shpreh, ka plaçkitur të ardhurat e shqiptarëve për t’i shërbyer një grupi të vogël njerëzish.
Deputetja demokrate theksoi se bujqësia po përballet me rënie prej -1%, gjë që sipas saj është pasojë e politikave të gabuara dhe cinike të qeverisë. Ajo shtoi se ndërsa mazhoranca flet për “Shqipërinë 2030” dhe integrimin europian, realiteti sipas saj është një ekonomi klienteliste dhe e pandershme.
“Në 12 vite, kjo qeveri ka ngritur një sistem të mbyllur, të korrptuar dhe që nuk nneh ndjeshmërinë, as përgjegjësi e respekt për qytetarin. Jo zhvillim për të gjithë por ekonomi të pakicës, jo shpresë por varfëri.
Në çdo ligj të miratuar këtu, janë shenja të një keqbërje sistemike që ka plaçkituar të ardhurat e qytetarëve shqiptarëve për t’i shërbyer një grushti njerëzish.
“Ka shkatërruar meritokracinë, rrëzuar konkurrencën ka ngritur monopole me ligje të miratuara nga ky kuvend. Kjo u vu re te tenderat e dhëna nga ish zëvendëskryeministrja që sot duhet të ishte e dorëhequr.
Shikoni lejet e drejtimit, koncesionet, kontratat e PPP që fituesit përcaktohen me mesazhe. Ky është modeli i një ekonomie klientelistë dhe jo një vendi që përfaqëson Evropën. Shqipëria e vitit 2030 që sot socialistët reklamojnë është vend i koncesinuar deri në palcë, i pandershëm me shumicën e qytetarët, dhe ku torta e madhe e pushteti ndahet për një grusht njerëzish.”, tha ajo.
