Autoriteti Kombëtar i Ushqimit ka bllokuar dhe kthyer një sasi prej 51 tonësh misër me origjinë nga Serbia, pasi analizat laboratorike kanë konfirmuar praninë e substancës toksike Aflatoksina B1.
Sipas njoftimit zyrtar, kontrollet janë kryer mbi dy ngarkesa misri të destinuara si ushqim për kafshë. Rezultatet e analizave treguan tejkalim të niveleve të lejuara të aflatoksinës, një substancë që mund të shkaktojë dëme serioze në shëndetin e kafshëve dhe të njeriut në rast konsumimi indirekt.
Njëra nga ngarkesat është kthyer në Serbi, ndërsa tjetra është bllokuar për asgjësim, në përputhje me procedurat ligjore të sigurisë ushqimore.
