Deputeti i Partisë Demokratike, Luçiano Boçi, ka reaguar ndaj arrestimit në Bruksel të ish-shefes së Politikës së Jashtme të BE-së, Federica Mogherini, e akuzuar për shpërdorim fondesh dhe ndikim të paligjshëm.
Përmes një postimi në Facebook, Boçi e ka cilësuar këtë ngjarje si një tjetër provë të korrupsionit që, sipas tij, lidh drejtpërdrejt kryeministrin Edi Rama me aferën e Kolegjit të Europës në Tiranë.
Sipas Boçit, Rama dhe Mogherini kanë përfituar 22 milionë euro përmes projektit të kampusit universitar, i cili u hartua në vitin 2019 nga vetë Rama dhe kryebashkiaku Erion Veliaj, duke anashkaluar projektin e miratuar më parë nga qeveria e Sali Berishës në vitin 2013.
“Rama-Mogherini jo vetëm kanë përlarë 17 + 5 milionë eurot e kampusit të Universitetit publik të Tiranës, por kanë shkelur ligjin dhe kanë anashkaluar edhe vendimin e KKT-së të vitit 2013,” – shkruan Boçi, duke shtuar se SPAK duhet ta hetojë këtë çështje korruptive në themel.
Postimi i plotë:
Rama-Mogerini jo vetëm kanë përlarë 17 + 5 milion eurot e kampusit të Universitetit publik të Tiranës, sipas projektit të hartuar nga Rama vetë e Veliaj në 2019.
Ata kanë shkelur ligjin dhe kanë anashkaluar dhe vendimin e KKT të 2013 dhe projektin e Kampusit të miratuar nga qeveria e atëhershme, e drejtuar nga prof.dok Sali Berisha.
SPAK duhet ta hetojë këtë çështje korruptive në themel!
