Autoritetet italiane kanë goditur një organizatë të dyshuar për trafik ndërkombëtar droge, e cila sipas hetimeve paraprake dyshohet se drejtohej nga një shtetas shqiptar me banim në Holandë, raportojne mediat italiane.
Në kuadër të operacionit të koordinuar nga Antimafia e Romës, janë ekzekutuar masa sigurie ndaj tetë personave të përfshirë në rrjetin kriminal.
Sipas hetimeve, shtetasi shqiptar i dyshuar si drejtues i grupit koordinonte përmes platformave të mesazheve të enkriptuara trafikun e kokainës drejt disa vendeve evropiane, përfshirë Italinë.
Në Itali, një pjesë e grupit merrej me marrjen e ngarkesave, depozitimin dhe shpërndarjen e tyre në zonat kryesore të aktivitetit të paligjshëm në kryeqytet, si Borghesiana, Pigneto, Spinaceto, Torre Spaccata, Alessandrino, Tor De Cenci, Finocchio, Capannelle dhe Tor Bella Monaca.
Për transportin e drogës dyshohet se përdoroheshin korrierë italianë dhe automjete të modifikuara.
Hetimet kanë dokumentuar qarkullimin e mbi 210 kilogramëve kokainë, prej të cilëve 130 kilogramë janë sekuestruar, me një vlerë të përllogaritur rreth 1 milion euro.
Gjatë operacionit u arrestuan në flagrancë tre persona, një italian dhe dy shqiptarë.
