Analisti Fatos Lubonja, në një intervistë për “News 24”, komentoi pezullimin e ish-zv/kryeministres Belinda Balluku dhe rolin e Gjykatës Kushtetuese në vendimmarrjet ndaj qeverisë.
Lubonja vlerësoi se nëse Kushtetuesja i jep të drejtë qeverisë për rastin Balluku, kjo do të ishte flagrante, pasi sipas tij korrupsioni është i dukshëm.
Ai shtoi se gjyqtarët e kanë të vështirë të vendosin pro qeverisë për shkak të skandalit të qartë, duke e cilësuar këtë një test të drejtësisë shqiptare.
Analisti komentoi gjithashtu presionin e mundshëm politik: “Rama mund të ushtrojë presion, por gjithashtu është mesazhi për Ballukun se ka mbështetje, por ka edhe ndikim të ndërkombëtarëve, si amerikanët”, tha Lubonja.
“Por çështja është a kemi një SPAK me regji? A kemi një drejtësi me prokurorë që kanë personalitetin e vet? Unë ngre si pyetje se a janë marrë vesh…Por është edhe varianti që guximi që ju vjen këtyre është guximi individual i njeriut. Një tjetër hipotezë, mund të them se kjo goditje ndaj Ballukut ka të bëjë me dy grupime brenda PS që po ndeshen aty. Janë të gjitha hipotezat”, u shpreh Lubonja, duke shtuar: “Të kesh mbështetje amerikane dhe kurajën e disa njerëzve, patjetër, që bëhet më shumë. Sot nga gjithë këto ngjarje njerëzit duhet të ishin në rrugë. Kur ndodhu 700 mijë eurosh-i I Ilir Metës a ju kujtohet se çfarë u bë? Por sot ka një lodhje dhe zhgënjim të madh të popullit me politikën. Ndikon edhe fakti që PS ka punuar për të rritur klientelën dhe për të korruptuar çdo qelizë të familjeve shqiptare”.
