Reshjet intensive të mëngjesit të sotëm kanë shkaktuar probleme të shumta në Pogradec, ku lumi i Vërdovës ka dalë nga shtrati duke dëmtuar rëndë infrastrukturën rrugore dhe përmbytur disa banesa.
Raportohet se uji ka shkatërruar trotuarin, kanalizimet dhe ka dëmtuar rrjetin elektrik, ku një shtyllë energjie paraqet rrezik shembjeje.
Ndërkohë, në lagjen nr. 1 të qytetit, për shkak të reshjeve të shumta, uji ka depërtuar në disa oborre banesash.
Problematika më e rëndë vjen nga fshati Turan, ku prurjet e rritura të lumit të Dunavecit kanë shkaktuar përmbytje në disa banesa.
Sipas banorëve, dëmet janë të konsiderueshme: uji ka hyrë në shtëpi duke i bërë ato të pabanueshme, është rrezikuar bagëtia dhe janë përmbytur bazat ushqimore.
Po ashtu, probleme paraqiten edhe në rrugën e fshatit Peshkëpi në Pogradec, duke bllokuar qarkullimin e automjeteve në të vetmen aks rrugor që lidh fshatin me qytetin.
