Qeveria ka depozituar këtë premte në Gjykatën Kushtetuese një kërkesë zyrtare që lidhet me pezullimin nga detyra të zëvendëskryeministres Belinda Balluku.
Në dokumentin e paraqitur, qeveria kërkon pezullimin e menjëhershëm të efektit të vendimit të GJKKO-së deri në momentin që Kushtetuesja të shqyrtojë çështjen.
Sipas kërkesës, situata paraqet një konflikt kompetencash mes ekzekutivit dhe Gjykatës së Posaçme, veçanërisht në lidhje me mënyrën se si një anëtar i Këshillit të Ministrave mund të pezullohet nga detyra.
Qeveria i kërkon Gjykatës Kushtetuese:
– Të vlerësojë konfliktin e kompetencës mes Kryeministrit, Këshillit të Ministrave dhe GJKKO-së;
– Të shfuqizojë vendimin nr.118, datë 19.11.2025, për pjesën që vendos masën ndaluese;
– Të pezullojë këtë vendim deri në përfundimin e gjykimit;
– Të interpretojë pikën 3 të nenit 103 të Kushtetutës, që lidhet me imunitetin e anëtarëve të qeverisë.
Belinda Balluku, është marrë zyrtarisht e pandehur, në 31 tetor 2025 dhe akuzohet nga Prokuroria e Posaçme për “shkeljen e barazisë në tendera e ankande publikë” e kryer në bashkëpunim, në procedurën për ndërtimin e Tunelit të Llogarasë, me fond limit 180 milionë euro. Ndërsa sot SPAK ka ngritur edhe një akuzë të re mbi Ballukun për abuzim me tendera për lotin 4 të Unazës së Madhe.
Ndërkohë përveç masave ndaj Ballukut, gjykata ka caktuar masë sigurie edhe për dy vartësit e saj, drejtori i KESH, Erald Elezi dhe kreu i ARRSH-së, Gentian Gjyli, të cilët janë lënë në “arrest shtëpie”.
