Gazetari Andi Bushati, i ftuar në Syri Tv komentoi mbrojtjen që kryeministri Edi Rama i bëri zv.kryeministres dhe ministres së pezulluar nga SPAK, Belinda Balluku.
Bushati theksoi se përtej argumenteve juridike, situata ka një dimension moral: një ministre që përballet me drejtësinë duhet të japë dorëheqjen, jo të futet në procedura të komplikuara ligjore.
Ai shtoi se, sipas deklarimeve të Ramës, kryeministri nuk po refuzon vendimin e gjykatës, pasi Balluku nuk mund të udhëtojë jashtë shtetit dhe nuk mund të ushtrojë funksione ministrore, por megjithatë vihet re një tentativë e qartë për ta mbrojtur.
Bushati argumentoi se Rama mund të jetë i detyruar ta mbrojë Ballukun edhe për arsye personale dhe politike, pasi precedenti i pezullimit të një zyrtari të lartë me vendim gjykate mund të përdoret nesër kundër vetë Ramës.
Bushati:
“Rama është i dënuar ta mbajë Belinda Ballkun në detyrë. Për ta justifikuar vendimin politik që ka marrë, ai po tenton të gjejë një rrugë të pranueshme juridike duke ju drejtuar Gjykatës Kushtetuese, dhe e treta që mund të themi është që se në dy të parat kemi të bëjmë me një vendim, të themi, juridik.
E treta ka të bëjë me një vendim moral. Pse duhet t’i hyjmë gjithë këtyre andrallave juridike kur mund të ngre një pyetje shumë të thjeshtë.
Kur një ministër, kur një zëvendës kryeministre vihet përballë përgjegjësisë të kësaj drejtësie paçavure që kemi ne, a duhet t’i japë dorëheqjen, a duhet t’i japë rrugë drejtësisë, apo duhet të futet në procedura juridike?
Për momentin nuk mund të flasim për diçka të rrezikshme, sepse nga sa kuptova unë nga ajo që tha sot kryeministri, kryeministri nuk është se e ka refuzuar vendimin e gjykatës.
Në një kuptim, Edi Rama sot tha që do e zbatojmë vendimin e gjykatës. Pra, Belinda Balluku nuk udhëton dot më jashtë shtetit. Belinda Balluku nuk firmos dot më si ministre apo zëvendës kryeministre. Në këtë kuptim nuk kemi një thyerje apo një prishje të rendit normal të të gjërave. Nga ana tjetër duket se kemi një tentativë për ta mbrojtur Ballukun.
Ndoshta Rama është i dënuar ta mbrojë Ballukun edhe për një gjë. Sepse precedenti që ka hapur drejtësia që një zëvendës kryeministre, një ministër apo nesër një kryeministër mund të pezullohet nga kryerja e vendimit të tij me vendim gjykate, nesër mund të cënojë dhe vetë Ramën.”
