Teksa Belinda Balluku prej disa orësh ndodhet në një takim me kryeministrin Edi Rama në ambientet e Kryeministrisë, Partia “Mundësia” po zhvillon një protestë para godinës qeveritare.
Në protestë marrin pjesë deputetët Agron Shehaj dhe Erald Kapri, bashkë me qytetarë që mbajnë pankarta me thirrje për dorëheqjen e Ballukut dhe paraqitjen e saj para drejtësisë. Protestuesit kërkojnë largimin e saj nga posti pas vendimit të GJKKO-së për pezullimin e zëvendëskryeministres nga detyrat publike.
Belinda Balluku, është marrë zyrtarisht e pandehur, në 31 tetor 2025 dhe akuzohet nga Prokuroria e Posaçme për “shkeljen e barazisë në tendera e ankande publikë” e kryer në bashkëpunim, në procedurën për ndërtimin e Tunelit të Llogarasë, me fond limit 180 milionë euro. Ndërsa sot SPAK ka ngritur edhe një akuzë të re mbi Ballukun për abuzim me tendera për lotin 4 të Unazës së Madhe.
