Pas sulmit të rëndë rus në Ternopil, ku u vranë 25 persona – mes tyre tre fëmijë – Ukraina ka kërkuar një reagim të menjëhershëm ndërkombëtar. Të enjten do të mblidhen Këshilli i Sigurimit i OKB-së dhe Këshilli i Përhershëm i OSBE-së, ku Kievi pritet të paraqesë provat dhe pasojat e sulmit që e cilëson si “vrasje të tmerrshme”.
Zëvendësministri i Jashtëm i Ukrainës, Andriy Sybiha, bëri të ditur se vendi i tij ka njoftuar të gjithë partnerët dhe organizatat ndërkombëtare për situatën, duke kërkuar dënim dhe drejtësi për viktimat.
“Nesër, në Këshillin e Sigurimit, Ukraina do të nxjerrë në pah vrasjen e tmerrshme të Rusisë për të paktën 25 persona, përfshirë tre fëmijë. Ne kërkojmë dënim, drejtësi dhe një reagim vendimtar,” shkroi ai në rrjete sociale.
Sybiha theksoi se Ukraina ka nevojë urgjente për sisteme të reja të mbrojtjes ajrore dhe pajisje shtesë për të mbrojtur civilët nga sulmet e vazhdueshme.
Ai njoftoi gjithashtu se të gjitha ambasadat ukrainase janë udhëzuar të ulin flamujt në gjysmë-shtizë dhe të hapin librat e zisë në kujtim të viktimave.
Në takimin e së enjtes, Ukraina pret një qëndrim të qartë dhe të ashpër ndaj veprimeve ruse, duke i cilësuar sulmet si një tjetër shkelje të rëndë të parimeve të Aktit Përfundimtar të Helsinkit dhe të normave ndërkombëtare të sigurisë.
