Nga Boldnews.al
Ministri që gjatë verës shfaqej me llërët perveshur, gjithnjë pasi zjarri kishte shkretuar çdo gjë, u shpreh në Parlament besimplotë se në vitin e ardhshëm sipas tij emergjencat civile do modernizoheshin. “…4.3 miliardë lekë janë parashikuar për emergjencat civile, përfshirë dy qendra të reja rajonale, 2 avionë zjarrfikës dhe investime në teknologjinë parandaluese”-tha Ministri i Mbrojtjes Pirro Vengu.
Në një fjalim mbrësëlënës për modernizimin e ushtrisë në mbrotje të vendit, patriotizmi i Vëngut shkoi tej parashikimeve, teksa u mburr se përgjatë vitit 2025 ishin rekrutuar 721 të rinj për të veshur uniformën ushtarake dhe se shumë shpejt do të niste edhe prodhimi i municioneve në vend.
Ndërsa Vengu krekosej për sukseset në fushën e mbrojtjes, mbesin në kujtesë pamjet me ushtarë të rraskapitur, pa mjete, pa veshje specifike, pa përgatitje dhe pa trajtim të cilët qëndronin me orë të zgjatur mes flakëve dhe tymit, ndërsa në fund të muajit si shpërblim marrin pagën 57 mijë lekë. Kaq vlen unfiforma e ushtarakut të thjesht sot!
Vende si Delvina, Gramshi, Finiqi dhe një pjesë e Tepelenës nuk njihen më. Zjarri ka shkrumbuar mijëra hektarë ullishte, vrashta, pemë frutore, pyje dhe kullota.
Ndërsa ushtarët dergjeshin maleve, herë pas herë ishin të detyruar të qëndronin gatitu para ministrit që nëpërmjet kameras shiste suksesin në shuarjen e zjarrëve, ndonëse flakët kanë përpirë gjithçka, sidomos në Delvinë dhe Gramsh, ku dëmet janë aq të mëdha sa çdo shifër që mund të alokohet për Emergjencat Civile në të ardhmen nuk e rikuperojnë dëmin e shkaktuar.
Ministri nuk dha Shifra sesi shpërdorohen fondet për Emergjencat Civile, të cilat më shumë se për mjete shkojnë për paga, seminare dhe takime të vazhdueshme buzë çdo pranvere kur mburren se do i bëjnë ballë zjarreve, por më pas ngrenë duart përpjetë në thirrjen e vazhdueshme për të mbërritur ndonjë mjet fluturues nga vendet e BE-së.
“Rishpërndarje të drejtë për bashkitë e vogla, në Fusha-Arrëz, Delvinë e Finiq për emergjencat civile. Është një buxhet angazhimi që Shqipëria të jetë më e përgatitur, mbrojtur dhe respektuar”, tha ndër të tjera Vengu.
Pavarësisht “trimërimit” se me këtë qeverisje mbrojtja është në nivele të larta, ministri ynë i mbrojtjes duhet të bëjë kujdes personal, sidomos nëse shkel në Greqi, pasi nuk është aspak çudi se emri i tij të figurojë ende në listën e personave që nuk e kanë kryer shërbimin e detyruar ushtarak.
