Kryedemokrati, Sali Berisha, ka dalë nga ambjentet e Prokurisë së Posaçme, aty ku u paraqit mëngjesin e sotëm për tu pyetur në lidhje me dosjen e 21 janarit ku pas një demonstrate të dhunshme të PS u vranë 4 protestues.
Në deklaratën e tij për mediat jashtë SPAK Berisha u shpreh se gjatë protestës nuk është qëlluar nga brenda kryeministrisë. AI thotë se asokohe ishte njeriu i rrethuar, dritaret e së cilit po qëlloheshin me gurë. Sipas Berishës atij i është kërkuar të largohet dhe sipas tij të shtënat janë të gjitha jashtë Kryeministrisë.
Ai thotë se ushtarët e Gardës kanë qëlluar nga jashtë godinës.
“Më është pyetur së çfarë ndodhi me 21 janar. Isha njeriu i rrethuar, dritaret e të cilit u goditën me gurë. Mu kërkua të largohem ose do të shkelje mbi kufoma. Gënjeshtër me bisht kur thoni që u qëllua nga brenda kryeministrisë. Të shtënat janë të gjitha jashtë kryeministrisë, shih filmimet. Ushtarët e Gardës kanë qëlluar, jo nga brenda. U qëllua nga vend rojet e Gardës. Garda ka një ligj që autorizon rojën të qëllojë sa herë dikush e kërcënon me ndonjë objekt. Të qëllojë në ajër, te këmbët apo të eliminojë rrezikun. Ky ligj u miratua nga PS jo nga ne. Garda nuk funksionon me urdhër, por me ligj.”– tha Berisha.
Berisha u shpreh gjithashtu se fletëthirrja e SPAK ndaj tij për këtë çështje, është vonuar pasi protesta e dhunshme e 21 janarit është organizuar nga vetë Edi Rama. Ky i fundit sipas Berishës ka penguar hetimet.
Kjo mosthirrje flet më shumë se çdo gjë tjetër, kjo mos-thirrje shkak kishte se Edi Rama organizoi protestën më të dhunshme. Kishte agjendë të qartë dhune. Kjo deklaratë është bërë shkak që të mos thirrem unë për një ngjarje dramatike që i mori jetën 4 demostruesve dhe plagosjen e më shumë së 100 efektivëve. Nuk është qëlluar nga brenda kryeministrisë””,- është shprehur Berisha.
