Në një rrugë të Saukut, uji derdhet lumë. Tubacionet e UKT-së janë çarë dhe prej muajsh në këtë gjendje nuk janë riparuar.
“Uji këtu është katastrofë, ka që në qershor. Jemi ankuar disa herë, do vijmë thonë.”
“Shumë ujë shkon dëm, as e çan kokën njeri. Një familjar i merrte në telefon ata të Ujësjellësit, nuk i përgjigjeshin fare.”
Në rubinetat e qytetarëve, uji shkon me orar tepër të kufizuar dhe zgjidhje kanë vetëm depozitat.
“Na vjen pasdite 1 orë, 1 orë e gjysmë. Ca kohë pati ndërprerje.”
“Po njëherë, po s’patëm depozitë, shkojmë në lumë të mbushim, është liqeni i Farkës aty mbrapa.”
“Shumë rëndë, uji i pakët. Ka pasur ditë që s’ka pas hiç ujë.”
Ankesat e banorëve të Tiranës pranë Ndërmarrjes së Ujësjellës Kanalizimeve bien gjithnjë në vesh të shurdhët.
Situatën tepër të rëndë me ujin e pijshëm e komentoi këtë të shtunë, 15 nëntor, edhe Kryeministri Edi Rama, që sipas tij gjithçka ndodh për shkak të keqmenaxhimit nga UKT.
“Ndermarrjet tona kanë burime njerëzore skarco brenda, ndaj do ngremë Operatorin Kombëtar të Ujit dhe do t’a drejtojmë në mënyrë të përqendruar, jo me ndërmarrje këtu, atje që s’janë vend për një vend, e do hyjë në BE.”/tvklan.al
