Nënkryetari i Këshillit Bashkiak, Dorjan Teliti, ka akuzuar Bashkinë e Tiranës për keqmenaxhim të buxhetit, duke deklaruar se gjatë nëntëmujorit të parë të vitit 2025, institucionit i janë rritur në mënyrë të konsiderueshme shpenzimet për paga, ndërsa investimet kanë mbetur prapa.
Sipas Telitit, bashkia ka shpenzuar 64 milionë euro për administratën, duke paguar më shumë për staf sesa për projektet jetike të kryeqytetit, ndërkohë që ritmet e investimeve rezultojnë katër herë më të ulëta se vetë planifikimi zyrtar.
Ai thekson se disa programe, përfshirë arsimin profesional, nuk kanë marrë asnjë fond investimesh, duke e cilësuar situatën si “tallje” dhe duke kërkuar zgjedhje të parakohshme në Bashkinë e Tiranës.
Postimi i plotë i Dorjan Telitit:
BUXHETI I TIRANËS ME “SHUMË KOKA”: PAGUAN MË SHUMË PËR STAFET SESA PËR INVESTIMET.
❌ Dikush nga Bashkia me “shumë koka” të na shpjegojë pse për 9 muajt e parë 2025 ka shpenzuar 64 milionë euro për pagat e një administrate të fryrë, ndërkohë që për investimet jetike të kryeqytetit ka paguar plot 5 milionë euro MË PAK.
❌ Dikush nga Bashkia me “shumë koka” të na shpjegojë se pse investimet po kryhen me ritme 4 herë më të ulta sesa planifikimi i po vetë bashkisë?
❌ Dikush nga Bashkia me “shumë koka” të na shpjegojë arsyet e dështimit të investimeve nga mbrojtja civile e zjarrfikësit, e deri te rrjeti rrugor rural dhe strehimi.
❌ Dhe pika kulmore, dikush nga Bashkia me “shumë koka” të na shpjegojë si është e mundur që asnjë qindarkë investim nuk është kryer në programin e arsimit profesional.
Ky nuk është menaxhim, është tallje!
Tirana s’ka nevojë për “shumë koka”, për të punësuar fiktiv dhe karrige të reja zyrash, por për shërbime, rrugë, shkolla, strehim, siguri dhe funksionalitet.
Një arsye më shumë që Tiranës i duhet ndryshimi, një arsye e fortë më shumë për zgjedhje të parakohshme në bashkinë e kryeqytetit.
