Çmontues minash koreano-veriorë janë vendosur në rajonin rus të Kurskut, të cilin forcat ukrainase e kontrollonin pjesërisht nga gushti 2024 deri në pranverën e 2025-ës, njoftoi sot Ministria e Mbrojtjes e Rusisë.
“Pas ndihmës së rëndësishme të njësive speciale të Ushtrisë Popullore të Koresë së Veriut në mposhtjen e armikut, tani çmontues minash koreano-veriorë kanë mbërritur në territorin e Kurskut”, theksoi gazeta zyrtare e Ministrisë së Mbrojtjes ruse, Krasnaya Zvezda.
Të trajnuar në qendra ruse për inxhinierë ushtarakë, çmontues koreano-veriorë, numri i të cilëve nuk është bërë i ditur, janë vendosur në rajonin e Kurskut me ndihmën e robotëve. Atje ende gjenden qindra mina, predha dhe pajisje shpërthyese pas tërheqjes së forcave ukrainase, sipas të njëjtës burim.
Gazeta, që i ka kushtuar një reportazh të gjerë çështjes, publikon gjithashtu foto të çmontuesve koreano-veriorë në punë. Në fund të qershorit, Rusia njoftoi se Pheniani do të dërgonte disa mijëra çmontues minash dhe teknikë ushtarakë për të ndihmuar në rindërtimin e rajonit të Kurskut.
Në fillim të nëntorit, Koreja e Jugut, duke iu referuar shërbimeve të inteligjencës, raportoi se rreth 5.000 ushtarë koreano-veriorë ishin dërguar në Rusi që nga shtatori për këtë qëllim.
Koreja e Veriut ka marrë pjesë aktivisht në luftën Rusi-Ukrainë, duke i ofruar Moskës trupa për të zmbrapsur forcat ukrainase nga Kursku.
Të dyja vendet lidhen me një marrëveshje mbrojtëse, e nënshkruar në vitin 2024 gjatë vizitës së presidentit rus Vladimir Putin në Korenë e Veriut.
