Prej katër ditësh, terminali i autobuzave të linjave interurbane dhe atyre që lidhin fshatrat me qytetin e Bulqizës është nën ujë. Niveli i ujit në disa pjesë të terminalit ka arritur deri në 40 centimetra, duke e bërë të pamundur qarkullimin e mjeteve dhe këmbësorëve.
E përmbytur vijon të jetë edhe rruga që lidh dy lagjet e qytetit, ku shumë automjete janë bllokuar në vend për shkak të ujit të grumbulluar. Shoferët janë detyruar të ndihmojnë njëri-tjetrin për të kaluar, ndërsa lëvizja e këmbësorëve është bërë pothuajse e pamundur.
Përmbytja ka prekur edhe bizneset përreth zonës, ndërsa banorët shprehen se kjo nuk është hera e parë që përballen me një situatë të tillë. Ata thonë se çdo herë që ka reshje, terminali dhe rrugët përreth mbushen me ujë për shkak të mungesës së sistemit të kanalizimeve.
“Çdo vit e njëjta histori. Kemi kërkuar disa herë që Bashkia ta zgjidhë këtë problem, por nuk është bërë asgjë,” shprehen drejtuesit e mjeteve dhe qytetarët./BW
