Presidenti Donald Trump bëri me dije se SHBA-të nuk do të marrin pjesë në samitin e G20 në Afrikën e Jugut për shkak të pretendimeve se njerëzit e bardhë po persekutohen në këtë vend.
Kreu i Shtëpisë së Bardhë tha se ishte një turp që Afrika e Jugut po pret takimin, ku udhëheqësit nga ekonomitë më të mëdha të botës do të mblidhen më vonë këtë muaj.
Asnjë nga partitë politike të Afrikës së Jugut përfshirë ato që përfaqësojnë afrikanerët dhe komunitetin e bardhë në përgjithësi, nuk kanë pretenduar se ka ndodhur gjenocid në Afrikën e Jugut.
Trump postoi në platformën e tij të mediave sociale Truth Social: “Është një turp që G20 do të mbahet në Afrikën e Jugut.”Afrikanerët (njerëz që rrjedhin nga kolonët holandezë, si dhe nga emigrantët francezë dhe gjermanë) po vriten dhe masakrohen, dhe tokat dhe fermat e tyre po konfiskohen ilegalisht”, shkroi ai.
Trump kishte thënë më parë se Afrika e Jugut nuk duhet të jetë fare në G20 dhe se ai do të dërgonte nënkryetarin JD Vance, në vend që të merrte pjesë vetë.
Por tani Shtëpia e Bardhë thotë se asnjë zyrtar amerikan nuk do të shkojë.
