Nga Agustin Gigante, LA VOZ DE IBIZA
Ibiza luajti një rol strategjik për një rrjet ndërkombëtar të trafikut të drogës, të drejtuar nga mafia shqiptare, sipas një hetimi të përbashkët të Policisë Kombëtare dhe Gardës Civile.
Organizata përdorte ishullin si pikë grumbullimi për kokainën dhe hashashin që hidhej në det nga anije tregtare që vinin nga Amerika e Jugut dhe Maroku; më pas, droga merrej nga skafe të fuqishme dhe ruhej në struktura të fshehta në ishull. Prej andej, droga dërgohej drejt Majorkës, Valencias dhe destinacioneve të tjera evropiane.
Lëndët narkotike, të hedhura në det të hapur brenda çantave të pajisura me sinjalizues GPS, mblidheshin nga skafe me tre motorë prej 300 kuaj fuqi secili. Operacionet kryheshin kryesisht natën për t’iu shmangur zbulimit nga forcat e sigurisë.
Çdo udhëtim mund të transportonte deri në 750 kilogramë drogë, të mbajtur në çanta të zhytura, të lidhura me rrjeta dhe të identifikuara me drita e koordinata të dakorduara paraprakisht. Sipas raporteve policore, kjo metodë u përdor të paktën 43 herë.
Organizata kriminale kishte ngritur në Ibiza një rrjet për fshehjen dhe ruajtjen e ngarkesave, gjë që e shndërroi ishullin në një qendër logjistike kyçe të trafikut të drogës në Evropë.
Kjo infrastrukturë lejonte fshehjen e sasive të mëdha të drogës dhe transportimin e saj të mëvonshëm drejt Majorkës dhe pjesës tjetër të gadishullit, kryesisht drejt Valencias.
Ndër masat e sigurisë të përdorura nga grupi ishte edhe vendosja e pajisjeve gjurmuese në automjetet policore, çka u mundësonte atyre të parashikonin lëvizjet e operacioneve dhe të përfundonin me sukses, si p.sh. zbarkimin e pothuajse dy tonëve hashash.
Megjithëse agjentët arritën të sekuestronin 687 kilogramë kokainë, 2.500 kilogramë hashash dhe më shumë se 1.5 milionë euro, të dhënat e nxjerra nga dokumentet e konfiskuara tregojnë se rrjeti kishte lëvizur sasi shumë më të mëdha: 2.107 kilogramë kokainë dhe 5.647 kilogramë hashash vetëm në Majorka, me një qarkullim që kalonte 25 milionë euro.
Kjo tregon se droga e sekuestruar përfaqëson vetëm një pjesë të vogël të sasisë së përgjithshme që ishte trafikuar.
Gjatë operacionit, i cili u pagëzua me emrin “Enroque Bal/Manso”, forcat e sigurisë zbuluan një detaj mjaft të çuditshëm në një pjesë të ngarkesës së sekuestruar: disa pako me kokainë kishin të ngjitur një fotografi të presidentit rus, Vladimir Putin.
Ky lloj shënjimi, i zakonshëm në rrjetet ndërkombëtare të trafikut të drogës, shërben për të identifikuar origjinën ose grupin përgjegjës për ngarkesën.
Nga pikat e grumbullimit në det, te depozitimi në Ibiza dhe shpërndarja e mëvonshme drejt Majorkës dhe Valencias, droga përfundonte në duart e klaneve të njohura si Son Banya, La Soledat apo Corea, për të vazhduar më tej drejt Italisë, Gjermanisë dhe Francës.
Operacioni “Enroque Bal/Manso” ka zbuluar një strukturë kriminale pa precedent, me lidhje me kapot e Evropës Lindore dhe degëzime në hotele, kompani fiktive dhe madje edhe në forcat e rendit.
Rrjeti i çmontuar drejtohej nga Stefan Milojeviç, i lidhur me bandën e motorëve “United Tribuns” dhe i konsideruar si “krahu ekzekutiv” i mafies shqiptare në Spanjë.
Falë kontakteve të tij me klane nga Mali i Zi dhe kapo nga Europa Lindore, ai arriti të krijonte një rrugë të drejtpërdrejtë trafiku nga Maroku në Ibiza, pa kaluar përmes ndërmjetësve në Gadishullin Iberik.
“Kjo është Liga e Kampionëve,” — thuhet se ka deklaruar Milojeviç në një bisedë të përgjuar nga Garda Civile, duke iu referuar përmasave të operacioneve të tij.
Sipas raporteve të hetimit, sekreti i të cilëve u hoq së fundmi, rrjeti është cilësuar si një nga më të fuqishmit që janë zbuluar ndonjëherë në Spanjë. Struktura funksiononte si një kompani logjistike kriminale, me sektorë për shpërndarje, kontabilitet, transport dhe pastrim parash.
Në këtë rrjet bashkëpunonin avokatë, policë, trafikantë vendas dhe madje edhe menaxherë të akomodimeve turistike. Blerja e tre hoteleve në Majorka, Pamplona dhe Almansa ishte thelbësore për të kanalizuar fitimet e trafikut të drogës.
Në mesin e mbi 100 personave të arrestuar, kishte figura të nivelit të lartë brenda dhe jashtë sistemit. Veçohet rasti i Faustino Nogales, inspektor i Policisë Kombëtare, i akuzuar për rrjedhje të informacionit sekret dhe për paralajmërimin e organizatës për operacionin përfundimtar — çka detyroi forcat e sigurisë të vepronin më herët.
Së bashku me të, u burgosën edhe avokati Gonzalo Márquez, i konsideruar truri financiar i skemës, dhe vetë Milojeviç. Të gjithë ndodhen në burgim parandalues që nga gushti.
