Ish-deputeti socialist dhe ish-Sekretari i Përgjithshëm i Ministrisë së Mjedisit, Alqi Bllako ka dhënë dëshminë tij para togave të zeza në GJKKO, pasi SPAK kërkoi dënimin me 5 vite burg.
Bllako ka kërkuar të shpallet i pafajshëm, me pretendimin se akuza e ngritur nga SPAK, nuk është bërë mbi bazën e një analize, ndërsa ia ka faturuar këtë, Klodian Zotos, që për ish-zyrtarin e Ministrisë së Mjedisit, ka pasur marrëdhënie të drejtpërdrejtë me anëtarët dhe kryetarët e komisionit të vlerësimit të ofertave.
Bllako shton se, kur është kryer vlerësimi i ofertave, shpallja dhe fituesi i koncesionit, ai nuk ka qenë në detyrë si sekretar i përgjithshëm.
“Në vendimin e arsyetuar nuk gjenden veprimet e ligjshme apo të paligjshme që unë kam bërë si sekretar i përgjithshëm. Sektretari i përgjithshëm ka zero rol në përcaktimin kontratës së koncesionit. Këtë të drejtë për hartimin dhe zhvillimin vetëm anëtarëve të këtij koncesioni. Korrupsioni pasiv është ngritur ndaj meje pa u bërë asnjë analizë. Klodian Zoto ka pasur marrëdhënie të drejtpërdrejtë me anëtarët dhe kryetarët e komisionit. Kur është kryer vlerësimi i ofertave shpallja dhe fituesi i koncesionit, unë nuk kam qenë fare në detyrë si sekretar i përgjithshëm. Nuk ka pasur as urdhër të ministrit për sekretarin për mbikëqyrjen e projektit. Sa i takon punësimit të zotit Bezhani pranë kompanisë së Klodian Zotos, në nëntor kur filloi punë nuk ishte lidhur kontrata me inceneratorin e Elbasanit dhe as kontrata me inceneratorin e Fierit. Mua me zotin Bezhani nuk më lidh asgjë dhe kur kam filluar punë në këtë ministri e kam gjetur aty”,- ka thënë Bllako.
Hetimet për Ballkon
Hetimet për Bllakon në këtë çështje lidhen me kontratën koncesionare të vitit 2017 për ndërtimin e landfillit, inceneratorit dhe rehabilitimin e vend-depozitimeve ekzistuese në Tiranë, të lidhur mes Ministrisë së Mjedisit dhe shoqërisë koncesionare “Integrated Energy B.V SPV” sh.p.k.
Sipas Prokurorisë, Bllako akuzohet se ka përfituar në mënyrë të tërthortë shumën prej rreth 120 mijë eurosh nga Klodian Zoto dhe Mirel Mërtiri, pronarët de facto të shoqërisë koncesionare, për blerjen e një pajisjeje për aktivitetin tregtar të babait të tij në Ersekë.
Gjithashtu, Bllako i ka propozuar Vladimir Bezhanit të vazhdonte detyrën si këshilltar i jashtëm i ministrit të Mjedisit, Lefter Koka dhe të ndihmonte me konsulencë juridike gjatë kohës kur kishte lindur idea e projektit të zhvillimit të procedurës së dhënies së koncesionit.
Për shërbimin e Bezhanit si këshilltar i jashtëm i ministrit të Mjedisit, Bllako akuzohet se i ka kërkuar aksionerit të shoqërisë propozuese “Integrated Technology Services” sh.p.k, Klodian Zoto, njëkohësisht dhe aksioner i shoqërisë koncesionare “Integrated Energy BV SPV” sh.p.k, që të jepte përfitimin e parregullt, duke e punësuar fiktivisht prej nga ka siguruar një përfitim në vlerën 7. 5 milionë lekësh.
Gjatë kohës që Bezhani ishte këshilltar i Kokës, ka mbajtur kontakte me Klodian Zoton sipas orientimit të Alqi Bllakos duke i siguruar të dhëna të marra nga autoriteti kontraktor. Alqi Bllako është shpallur fajtor edhe për inceneratorin e Elbasanit, si dhe atë të Fierit.
Sa i përket inceneratorit të Tiranës, GJKKO ka dënuar edhe Lefter Kokën Taulant Tushën, Namik Samixhiun, Bledar Karolin, Fatjon Muratin, Valbona Ballgjinin dhe Sidita Kopliku, ndërsa Jetmir Llapaj është shpallur i pafajshëm. Çështja ndaj Alqi Bllakos ishte ndarë më vete nga të pandehurit e tjerë.
